تاند:( یکشنبه، د میزان ۹ مه) د افغان ښځو، نجونو او بشري حقونو لپاره د امریکا د متحدو ایالتونو ځانګړې استازې رینا امیري وایي، چې په افغانستان کې د نېمایي نفوس له حذف او د وېرې او جبر کولتور له واکمنولو سره طالبان د خلکو د ژوند ښه کیدو ادعاوې نه شي کولای.
نوموړې دا څرګندونې د طالبانو لخوا د یو شمېر نیول شویو ښځینه او نورو فعالانو د خوشې کولو په غوښتنلیک کې کړي دي.
رینا امیري پر خپلې اېکس پاڼې لیکلي، چې د فعالانو نیول او بندي ساتل د طالبانو لخوا بې عدالتي ده.
په وروستیو کې د طالبانو پر ورته نیونو بیا نیوکې زیاتې شوې دي.
پرون د تعلیمي فعال مطیع الله ویسا کورنۍ خبر ورکړ، چې طالبانو د هغه له نیول کیدو شپږ میاشتې وروسته د نوموړي دوسیه خپلې محکمې ته استولې ده.
د ویسا کورنۍ اندېښمنه ده، چې طالبانو ممکن له هغه څخه جبري اعترافونه هم اخیستي وي.
دا په داسې حال کې ده، چې طالبان تل د بشري حقونو د تامین ادعا کوي او خلکو سره د ناوړه چلند تورونه بې اساسه بولي
.
About the Author
